நபிகள் நாயகம் (ஸல்) பயோடேட்டா

நபிகள் நாயகம் ( ஸல் ) வரலாற்றுச் சுருக்கம் 

(BIO _DATA)

தொகுப்பு மௌலானா மௌலவி அ. அப்துல் அஜீஸ் பாக்கவி

பெயர் : முஹம்மது

( பாட்டனார் சூட்டிய பெயர் . அரபு மொழியில் புகழப்படுபவர் என்று பொருள் )

பிறந்த தேதி: 570 ஏப்ரல் 20 ரபீஉல் அவ்வல் 12 திங்கள் கிழமை

பிறந்த இடம் மக்கா - சவூதி அரேபியா

தகுதி:

1 - 40 வயதில் நபி

( இறைவனது செய்திகளை மக்களுக்கு சொல்வதற்கு தேர்வு செய்யப்பட்ட மனிதர்)

2 - ரஸுல் - இறைத்தூதர் ( புதிய சட்ட அமைப்பு வழங்கப்பட்டவர்)

3 - இறுதித் தூதர்

கல்வி :எழுதப்படிக்க கற்காதவர்

தந்தை : அப்துல்லாஹ் பின் அப்துல் முத்தலிப்

(முஹம்மது நபி (ஸல்) ஆமினா அம்மாவின் கர்பத்தில் ஆறு மாத சிசுவாக இருக்கும் போது அப்துல்லாஹ் மரணமடைந்தார். )

தாயார் : 

ஆமினா பின்து வஹப்

(முஹம்மது நபியின் ஆறாவது வயதில் தாயார் ஆமினா இறையடி சோந்தார்)

பாட்டனார் (கள்) :-

அப்துல் முத்தலிப் -பின் - ஹாஸிம் பின் - அப்து மனாப் பின்- குஸை

பெரிய தந்தை : அபூதாலிப்

முதல் திருமணம் 25 வயதில் 40 வயதுடைய விதவைப்பெண் கதீஜா ( ரலி)  அவர்களை திருமணம் செய்தார்கள். 25 ஆண்டு மணவாழ்விற்குப்பின் கதீஜா (ரலி) மரணமடைந்தார்கள்.

மற்ற திருமணங்கள் கதீஜா (ரலி) வின் மரணத்திற்குப்பின் அரசியல் / சமூகநல்லிணக்கம் சமய மேம்பாடு ஆகிய காரணங்களுக்காக அண்ணலார் மேலும் பல பெண்களை திருமணங்கள் செய்தார்கள். அதில் ஜைனப் பின்து ஹுசைமா நபிகளாரின் காலத்திலேயே இறந்தார்கள். பெருமானார் (ஸல்) அவர்கள் இறந்த போது அவருக்கு 9 மனைவியர் இருந்தனர். ( 2 )

மனைவியர் பெயர்கள் :-

1) சவ்தா (ரலி)

2) ஆயிஷா பின்து அபூபக்கர் (ரலி)

3) உம்முசல்மா (ரலி)

4) ஹப்ஸா பின்து உமர் (ரலி)

5) ஜைனப் பின்து ஜஹ்ஷ் (ரலி)

6) ஜுவைய்யா (ரலி)

7) உம்மு ஹபீபா பின்து அபீசுப்யான் (ரலி)

8) ஸபிய்யா (ரலி)

9) மைமூனா (ரலி)

10) ஜைனப் பின்து ஹுசைமா (ரலி)

குழந்தைகள்:-

 ( 4 பெண் 3 ஆண் மொத்தம் 7 )

1) காஸிம் (ரலி)

2) ஜைனப் (ரலி) - கணவர் - அபுல் ஆஸ் (ரலி)

3) ருகய்யா (ரலி) - கணவர் - உஸ்மான் (ரலி)

4) உம்முகுல்ஸும் (ரலி) - கணவர் - உஸ்மான் (ரலி) 5) ஃபாத்திமா (ரலி) - கணவர் - அலி (ரலி)

6) தாஹி (ரலி) ( இவர்கள் 6 பேரும் கதீஜா (ரலி) அம்மையாருக்கு பிறந்தவர்கள். )

7) இபுறாகீம் (ரலி) ( இவர் மாரிய்யதுல் கிப்திய்யா ( ரலி ) அவர்களுக்கு பிறந்தவர். ஆண்குழந்தைகள் மூவரும் சிறு வயதிலேயே இறந்து விட்டனர் )

முக்கிய நிகழ்வுகள்

40 வயதில் ஹிரா மலைக்குகையில் வானவர் ஜிப்ரயீல் (அலை) அவர்களை சந்தித்தார்கள் . முதல் வேத வசனம் அருளப்பட்டது

தாயிப் பயணம் - ஹிஜ்ரத்திற்கு முந்தைய ஆண்டு

தனது 52 வயதில் மிஃராஜ் விண்ணுலகப்பயணத்திற்கு அழைத்துச் செல்லப்பட்டார்கள். இறைவனை சந்தித்து உரையாடினார்கள்.

தனது 53 வயதில் மக்காவை விட்டு வெளியேறி மதீனாவில் குடியேறினார்கள்.

இதுவே ஹிஜ்ரத் எனப்படுகிறது.

ஹிஜ்ரி 10 ம்ஆண்டு சுமார் 1 லட்சம் தோழர்களுடன் ஹஜ் செய்தார்கள். அதற்கடுத்த வருடம் பெருமானார் (ஸல் ) அவர்கள் இறந்து விட்ட காரணத்தால் அது விடை பெறும் ஹஜ் ( ஹஜ்ஜத்துல் வதா ) என அழைக்கப்படுகிறது. ( 3 )

போர்கள் :-

பல போர்கள் அவரது வாழ்க்கையின் மீது திணிக்கப்பட்டன. வலிய வந்து தொல்லை கொடுத்த அக்கிரமக்காரர்களை தடுக்கவும் உயிருக்கு நிகராகப் பாதுகாத்துப் போற்றி வரும் இஸ்லாமியப் பயிரைப் பாதுகாப்பதற்காகவும் மதீனாவில் அவர்  வாழ்ந்த 10 வருட காலங்களில் தானே 27 போர்களை மேற்கொள்ளவும் 38 படையெடுப்புகளுக்கு தனது தோழர்களை அனுப்பி வைக்கவும் நேர்ந்தது. ஆதிக்க விவாக்கமோ/ வலுவில் மதத்தை திணிப்பதோ அப்போர்களின் நோக்கமல்ல. .அப்போர்களின் போது மிக எச்சரிக்கையாக மனித உயிர்கள் வீண் பலியாகாமல் நபிகள் நாயகம் (ஸல்) அவர்கள் பார்த்துக் கொண்டார்கள் . இப்போர்களில் மொத்தம் உயிரிழந்தவர்கள் 1018 போர் மட்டுமே. நபிகள் நாயகம் (ஸல் ) அவர்கள் மேற்கொண்ட 27 படையெடுப்புகளில் 9 ல் மட்டுமே சண்டை நடந்தது. அவையாவன.

1 பத் ஹிஜ் 2

2 உஹத் ஹிஜ் 3

3 அகழ்யுத்தம் ஹிஜ் 5

4 பனூகுறைழா ஹிஜ் 5

5 முரைஸிஃ ஹிஜ் 5

6 கைபா ஹிஜ் 7

7 பத்ஹ் மக்கா ஹிஜ் 8

8 ஹுனைன் ஹிஜ் 8

9 தாயிப் ஹிஜ் 8

ஒப்பந்தங்கள் :-

அகபா ஒப்பந்தங்கள்

நபி (ஸல் அவர்கள் மக்காவில் பிரச்சாரம் செய்து கொண்டிருந்த போது அவரை ரகசியமாக சந்தித்து மதீனா மக்கள் செய்து கொடுத்த சத்தியப்பிரமாணங்கள் அகபா உடன்படிக்கைகள் எனப்படும் . கி பி 620 முதலாம் அகபா உடன்படிக்கையின் போது மதீனா வாசிகள் ஆறு பேர் முஸ்லிம்களாயினர்.

621 இரண்டாம் அகபா உடன்படிக்கையின் போது 12 பேர் முஸ்லிம்களாயினர் 622 மூன்றாம் அகபா உடன்படிக்கையின் போது 70 பேர் முஸ்லிம்களாயினர்

நபி (ஸல்) அவர்கள் மதீனா வந்து சேர்ந்தவுடன் மதீனாவைச் சுற்றி இருந்த பனூகைன்காஃ - பனூன்னழீ - பனூ குறைழா ஆகிய மூன்று யூதக் குழுக்களுடனும் சமாதான ஒப்பந்தம் செய்தார்கள்.

ஹுதைபிய்யா உடன்படிக்கை ஹிஜ்ரத் 6 ம்ஆண்டு முஸ்லிம்களுக்கும் மக்காவாசிகளுக்கும் இடையே நடைபெற்றது.இந்த ஒப்பந்தத்தின் 3 அம்சங்களில் இரண்டு அம்சங்கள் ஒரு தரப்பாக / எதிரிகளுக்குச் சார்பாக இருந்த போதும் ( 4 )

10 வருடங்களுக்கு ஒருவரோடு ஒருவர் சண்டையிட்டுக் கொள்ளக்கூடாது என்ற 3 வது அம்சத்திற்காக இதை நபிகள் நாயகம்(ஸல்) அவர்கள் ஒத்துக் கொண்டார்கள். இது இஸ்லாமியப் பிரச்சாரப் பணிக்கு மிகவும் உதவிகரமாக அமைந்தது/ எனவே இந்த ஒப்பந்தத்தை தெளிவான வெற்றி என அல்லாஹ அருள்மறையில் (1-48) வர்ணித்தான்.

அற்புதங்கள் :-

அல்லாஹ்  ஒருவரை நபி எனத் தேர்வு செய்யும் போது மக்களிடம் தன்னை நிரூபித்துக் கொள்வதற்காக அவருக்கு சில அற்புதமான காரியங்களைச் செய்யும் ஆற்றலை வழங்குகிறான். ஒரு நபி நிகழ்த்திக்காட்டும் வழக்கத்திற்கு மாற்றமான செயல்களுக்கு முஃஜிஸா ( அற்புதம் ) எனப்படும். நபிகள் நாயகம் (ஸல் ) அவர்களது பிரதான பெரிய அற்புதம் குர்ஆன் எனும் இறை வேதமாகும்/ ஆயினும் வேறு பல அற்புதச் செயல்களும் நபி ( ஸல் ) அவாகளது வாழ்வில் நடந்ததுண்டு அவற்றில் முக்கியமானது. நபிப் பட்டம் பெற்ற 5 ம் ஆண்டு அண்ணலாரது விரலசைவுக்கு ஏற்ப சந்திரன் இரு கூறாகப் பிளந்து தனித்தனியே சென்று பிறகு ஒன்றானது.

சீர்திருத்தங்கள் :-

மது / சுதாட்டம் / விபச்சாரம் / திருட்டு ஆகியவற்றை ஒழித்தார்கள்.

பெண் சிசுக்கொலையை முற்றாகத் தடுத்து நிறுத்தினார்கள்.

ஆணாதிக்க கொடுமைகளிலிருந்து பெண்களுக்கு விடுதலைப் பெற்றுத் தந்தார்கள்.

பெண்களுக்கு வாழ்வுரிமை /மண உரிமை மணவிலக்கு உமை எல்லாவற்றுக்கும் மேலாக சொத்துரிமையையும் பெற்றுத் தந்தார்கள்.

வட்டி / மோசடி/ கொலை /கொள்ளை ஆகிவற்றை தடுத்து நிறுத்தினார்கள்.

இனவெறி / நிறவெறி / ஜாதிக் கொடுமைகளை நீக்கி மனித சமத்துவம் நிலைநாட்டினார்கள்.

சாதனைகள் :-

தனது நாற்பதாவது வயதில் நபி எனப் பிரகடனப்படுத்தப்பட்டதிலிருந்து தொடாந்து 23 ஆண்டுகாலப் பிரச்சாரத்தின் காரணமாக சிலை வணக்கத்தில் மூழ்கிப்போயிருந்த அரபுலகத்தை ஏகத்துவ வெளிச்சத்தின் பாதைக்கு அழைத்து வந்தார்கள் . எந்த அளவுக்கென்றால் அதன் பிறகு அம்மக்கள் நெருப்பில் விழுவதை விடக் கொடிய விஷயமாக அதைக் கருதினார்கள்.

மூடப்பழக்க வழக்கங்களும் மூக்கத்தனமான நடைமுறைகளுமே வாழ்வாகக் கொண்டிருந்த அம்மக்களை மென்மைப் படுத்தி / அவர்களது அறிவாற்றலை வளர்த்து ஒரு சிறந்த நாகரீகத்திற்கு சொந்தக்காரர்களாக மாற்றினார்கள்.

சிறு சிறு குடும்பங்களாக வாழ்ந்து வந்த அரபுக்குலங்களை ஒரு தேசிய இனமாக உருவாக்கினார்கள்.

அரபுலகின் அறியப்பட்ட வரலாற்றில் முதன்முறையாக அரபு தீபகற்பம் / எமன் / பஹ்ரைன் உள்ளிட்ட பெரிய அரசாங்கம் ஒன்றை அமைத்துக் கொடுத்தார்கள். உலகம் முழுமைக்கும் இறைவனின் இறுதித் தூதராக இருந்து முழுமையான இஸ்லாமிய நெறியை செயல்படுத்திக்காட்டினார்கள். இன்றைக்கு உலகில் வாழும் 3 ல் ஒரு பகுதியினர் நேரடியாகவும் மற்றும் பலர் மறைமுகமாகவும் அவரது வாக்கையே வாழ்வாகக் கொண்டு வாழ்ந்து வருகின்றனர்.

தோழர்கள் :-

அன்னாரது தோழர்கள் சஹாபாக்கள் எனப்பட்டனர். தாயகமான மக்காவைத் துறந்து மதீனாவில் குடியேறியோ முஹாஜி ( அகதி ) என்றும் மதீனாவைப் பிறப்பிடமாக கொண்ட தோழர்கள் அன்சார் ((உதவியாளர்)என்றும் அழைக்கப்பட்டனர்.

முக்கியமான தோழர்கள்

1 அபூபக்கர் (ரலி)

2 உமர் (ரலி)

3 உஸ்மான் (ரலி)

4 அலி (ரலி)

5 சஃதுப்னு அபீவக்காஸ் (ரலி)

6 சயீதுப்னு ஜைத் (ரலி)

7 அபூ உபைதா (ரலி)

8 சுபை (ரலி)

9 தல்ஹா (ரலி)

10 அப்துர் ரஹ்மான் இப்னு அவ்ப் (ரலி)

உயர்ந்தோனை நோக்கி

தனது 63 வயதில் ஹிஜ்ரி 11 ரபீஉல் அவ்வல் 12 ம் தேதி ( கி பி 632 ) திஙகட்கிழமை பயணமானார்கள். மதீனாவில் மஸ்ஜிதுன்னபவி பள்ளிவாசலினுள் அமைந்துள்ள அன்னை ஆயிஷா ( ரலி ) அவர்களின் அறையில் புதன்கிழமை நல்லடக்கம் செய்யப்பட்டார்கள். இன்னா லில்லாஹி `வஇன்னா இலைஹி ராஜிஊன்.

முஹம்மது (ஸல்) அவர்கள் எங்கள் தலைவர்

அவருக்கு கீழ்பணிந்ததனால் எங்களுக்கு மரியாதை வந்தது 

( ஓரு அரபுப் பாடல் )

தொகுப்பு ;- மௌலானா மௌலவி அல்ஹாஜ் கோவை 

அப்துல் அஜீஸ் பாக்கவி ஹஜ்ரத் அவர்கள்.

வெளியீடு ;- மன்பயீ ஆலிம்.காம்

சுன்னத் வல் ஜமாஅத் பேரியக்க வாழூர் மற்றும் மலேசியக் கிளைகள்.

வரலாற்று ஒளியில் வள்ளல் நபி (ஸல்லல்லாஹு அலைஹி வஸல்லம்) பெற்ற மகத்தான வெற்றி!

இவ்வுலகைத் திருத்திய தீர்க்கதரிசி உத்தம தூதர் உம்மி நபி நாதர் நானிலம் சிறக்க வந்துதித்த இறைத்தூதர் ஈருலக நாயகர்,நபிகள் நாயகம் (ஸல்) அவர்களைத் தவிர அவர்களுக்கு முன்னர் எந்த நபிமார்களின் வாழ்வும், வாக்கும்,முறையாக தொகுக்கப்பட்ட எந்த  வரலாற்றுப் பக்கங்களிலும் பதிவு  செய்யப்படவில்லை.இதன் விளைவு வரலாற்றுப்பூர்வமாக  அறிவியல் மட்டத்தில் அவர்களின் நபித்துவம் நிரூபனமானதாக இல்லை.ஏசு நாதர் என்ற ஈஸா நபி (அலை) அவர்கள். முந்தய தீர்க்கதரிசிகளில் கடைசி தூதராக வந்தவர்களாவர்.ஆனால் அவர்களின் நிலையும் கூட வரலாற்று ஒளியில் பார்க்கப் போனால் ஒரு  மேற்க்கத்திய சிந்தனையாளருக்கு இப்படி சொல்ல வேண்டியது வந்தது. (இதை நாம் ஏற்கவில்லை என்றாலும் அவர் இவ்வாறு கூறுகிறார்.)HISTORICALLY IT IS GUITE DOOB FULL WHETHER CHRIST EVER EXISTED AT ALL.(B.RUSSELL) '' இந்த உலகில் ஏசு நாதர் என்று ஒரு ஆள் எப்போதாவது இருந்தாரா என்பதே வரலாற்றில் பெரும் சந்தேகத்திற்குறிய விஷயமாகும்'' (பி -- ரஸ்ஸல்) ஆனால் இது இறுதித்தூதர் முஹம்மது நபி (ஸல்) அவர்கள் விஷயத்தில் முற்றிலும் மாறுபட்டதாகும்.

 நபி (ஸல்) அவர்களின் இருப்பு,சரித்திரத்தைக் கவனித்து, எந்தளவுக்கு ஒப்புக்கொள்ளப்பட்ட செய்தி என்றால்,அவர்கள் விஷயத்தில்,ஒரு ஆய்வாளர் இப்படி எழுதவேண்டியது தான் வந்தது.

MOHAMMAD WAS BORN WITH IN THE FULL LIGHT OF HISTORY (HITTI)  '' முஹம்மது '' வரலாற்றின் முழு ஒளியில் பிறந்தார் (ஹிட்டி) அந்த நபியின் உயிரோட்டத்திற்கான மிக முக்கியமான ஒரு காரணம் அவர்களுக்கு வழங்கப்பட்ட நிலையான, உயிருள்ள முஃஜிஸாவான அல் குர்ஆனாகும். இது இன்னும் கூட திருத்தப்படாத சரித்திர சான்றாக ஜொலித்துக்கொண்டிருக்கிறது.

ஆதம் நபி முதல் ஈஸா நபி வரை இலட்சத்திற்கும் அதிகமான தீர்க்கதரிசிகள் மக்களுக்கு இறை உண்மையை வெளிச்சம் போட்டு காட்டி,அல்லாஹ்வை பயந்து,வாழ்க்கையை துய்மையாக நடத்துமாறு  வலியுறுத்தினார்கள்.ஆனால் மிகவும் சொற்பமான நபர்களே அவர்களுக்குப்பின் அணி திரண்டனர்.நபி யஹ்யா (அலை) அவர்களுக்கு,கூட செல்ல ஒருவர் கூட கிடைக்கவில்லை என்பதுடன் இறுதியில் அவர்கள் கொலை செய்யப்பட்டு ஷஹீதாக்கப்பட்டார்கள்,நபி லூத் (அலை) அவர்களை அவர்களின் இரு மகளை தவிர வேறு யாரும் ஏற்கவில்லை.நபி நூஹ் (அலை) அவர்களை ஏற்றுக்கொண்டு அவர்களுடன்,கப்பலில் பயணித்தவர்கள் தவ்ராத் -- (தோரா) தரும் தகவலின்ப்டி வெறும் எட்டு நபரேயாகும்.

நபி இப்றாஹீம் (அலை) அவர்கள் தங்களது தாயகமான இராக்கை விட்டு வெளியேறிய போது அவர்களுடன்,அவர்களின் இரு மனைவிமார்களான ஹாஜரா,ஸாரா,அம்மையார்களைத் தவிர அவர்களின் சகோதரர் லூத் (அலை) அவர்களும் இருந்தார்கள். அதற்குப்பிறகு அவர்களின் குழுவில் அவர்களது இரு பிள்ளைகளான நபி இஸ்மாயீல் (அலை) நபி இஸ்ஹாக் (அலை) ஆகியோரும் சேர்ந்து கொண்டார்கள்.நபி ஈஸா அலை) அவர்களுக்கு முழு முயற்சி செய்த பிறகும் கிடைத்தவர்கள் 12.நபர்கள்.இவர்களும் கடைசி நேரத்தில் அவர்களை கொலை வெறியூதர்களிடம் ஒப்படைத்து விட்டு சென்று விட்டனர். (மத்தாயு.56,26)

பெரும்பாலான நபிமார்களின் நிலை இவ்வாறு தான் இருந்தது.சில நபிமார்கள் தாங்கள் மட்டுமே இருந்தனர்,சிலருக்கு கூட செல்ல சிலர் கிட்டினர்.மனிதர்களில் அல்லாஹ்விடத்தில் மிகவும் முக்கியமானவர்களாகவும்,மேன்மை மிக்கவர்களாகவும் இருந்தவர்கள் நபிமார்கள்.ஆனால் ஆச்சரியம் என்னவெனில்!எல்லா வரலாற்றிலும் இவர்களே மிகவும் வேண்டாதவர்களாக நடத்தப்பட்டார்கள்.நாட்டை ஆண்ட அரசர்கள்,படை நடத்திச் சென்ற சிப்பாய்களின் சரித்திர சம்பவங்களை, வரலாறுகள் முழுமையாக குறித்து வைத்திருக்கின்றன.ஆனால் நபி ஆதம் (அலை) அவர்கள் முதல்,நபி ஈஸா (அலை) அவர்கள் வரை,எந்த நபிக்கும் முறைப்படி தொகுக்கப்பட்ட வரலாற்று ஆவணங்களில்,இடம் கிடைக்கவில்லை

அரிஸ்டாட்டில் (கி.மு,384 -- 322) நபி மூஸா அலை அவர்களுக்கு,ஆயிர வருடங்களுக்குப் பிறகு பிறந்தவர்.ஆனால் நபி மூஸா (அலை) அவர்களின் பெயரைக் கூட அந்த அறிஞர் தெரிந்து வைத்திருக்கவில்லை.இதற்கு காரணம் அதிகமான நபிமார்களை அவர்களின் சமூக மக்களே நிராகரித்துவிட்டார்கள்.அவர்களின்,வீடுகளையும்,சுவடுகளையும்,தொடைத்தெறிந்து சமூகத்தில் மதிப்பில்லாமல் ஆக்கினர்.

அவர்களைக்குறித்து,பதிவு செய்து வைக்கும்,அளவுக்கு அவர்களை முக்கியமானவர்களாக கருதவில்லை.நபிமார்களுடன் அவர்கள் இப்படி ஏன் நடந்துகொண்டார்கள் இதற்கு ஒரே காரணம்தான் இருந்தது.அவர்கள் தங்களுடைய கூட்டத்தார்களை விமர்ச்சித்தார்கள்.மனிதனுக்கு அதிகம் பிடித்தது,அவனைப் புகழ்வது.மனிதனுக்கு அறவேபிடிக்காதது,அவனுக்கு எதிராக கருத்து தெரிவிப்பது.

நபிமார்கள் எது சரி,எது தவறு என்று தெளிவாக்க வந்தவர்கள்.அதனால் அவர்கள் தங்கள் சமூகத்தாருடன் சமரசம் செய்துகொள்ளாமல் அவர்களின் தவறான கொள்கைகளையும்,தவறான செயல்பாடுகளையும்,சாடுவதற்கு சற்றும் தயங்கியதே இல்லை.இதனால் அவர்களின் கூட்டத்தினர் அவர்களுக்கு எதிரிகளாயினர்.இதனால் ஏற்பட்ட மிகப்பெரிய பாதிப்பு என்னவெனில், அந்த நபிமார்களுக்கு இறக்கி வைக்கப்பட்ட வேதங்கள்.ஆகமங்கள் மற்றும் இறக்கியருளப்பட்ட இறைச்செய்திகள் எதுவும் பாதுகாக்கப்படாமல் போயின.ஏனெனில் நபிமார்களுக்குப் பிறகு அவைகளை பாதுகாப்பது,அவர்களை ஏற்றுக் கொண்டவர்கள்தான்.ஆனால் துரதிஸ்டவசமாக அவர்களைப் பின்பற்றுவோர் யாரும் இல்லாமல் போயினர்.அல்லது அதைப் பாதுகாக்குமளவுக்கு பெரிதாக இல்லாமல் போயினர்.

மனிதர்களின் இந்த நிலை குறித்து ஆதியிலேயே அறிந்திருந்த அல்லாஹ்,ஆதியும்,அந்தமும் இல்லா அந்த காலமில்லா அஸலியத்தான அமைப்பில் அவனது விதிப்படி தீர்க்கமான ஒரு முடிவு செய்திருந்தான் நபிமார்களின் வரிசையில் கடைசி கால கட்டத்தில் தனது பிரத்யேகமான ஒரு வழிகாட்டியை அனுப்புவது என்றும்,அந்த நபியின் மார்க்கம் தழைத்து வளரும்.அவருக்கு தனது பலமான பேருதவி கொண்டு அவர்கள்,ஒவ்வொரு கட்டத்திலும் தங்களது முன்னிலையாளர்களை,மிகைத்து,அவர்கள் கொண்டு வந்த சத்தியத்தை அவர்களை ஏற்க்க செய்யும் வரை அவர்களை அல்லாஹ் தன் பக்கம் கைப்பற்றுவதில்லை என்றும்,இறைவனின் படை எப்போதும் அவர்களுடன் இருந்து அவர்களை -- நிராகரிப்பவர்களை நிர்மூலமாக்கி இறை மார்க்கத்தை எப்போதும் உறுதியான தளத்தில் கொண்டு வந்து நிறுத்துவது என்றும்,அப்போது இறைவேதத்தை பாதுகாக்க தனி அமைப்பு உருவாகி விடும்,என்றெல்லாம் அவனது இந்த முடிவான முடிவு மண்ணுலகில் மன்னர் நபி(ஸல்) அவர்களின் வருகையால் வாகை சூடியது.''

'' எப்படி கடல்,நீரால் நிரம்பிஉள்ளதோ அது போல பூமி,இறைவனின் மகத்துவமிக்க ஆன்மீக அறிவால் நிறையும்.'' என்ற பைபிளின் வார்த்தை வள்ளல் நபி (ஸல்) அவர்களின் வருகையால் நடந்தேறியது.ஆயிரமாயிரம்,ஆண்டுக்கு முன்னரே வேதமறைகளின் மூலம் முன்னறிவிப்பு செய்யப்பட்ட அந்த நபி,அரேபியாவின் பாலைவன பூகோள அமைப்பிலிருந்து தோன்றுவார்.இஸ்ரவேலர்களின் இன்னொரு வீட்டிலிருந்து தோன்றுவார் -- அதாவது அவர்களது சகோதரர்களான பனூ இஸ்மாயீல் சந்ததியினரின் பிள்ளைகளிலிருந்து தோன்றுவார் -- அது ஏசுவின் வருகைக்குப் பிறகு ஆகியிருக்கும். அவர்களுடைய தோழர்கள்.'' இறைவனால் விலைக்கு வாங்கப்பட்டவர்கள்'' எனப்படுவர். அவர்களை எதிர்க்கும் சமுதாயம் நாசத்தை சந்திக்கும்.ஆதி மலை (போன்ற) பாரசிகமும்,ரோமபுரியும்,அவருக்கு முன் மண்டியிடும்.அவர்களின் ஆட்சி தரையிலும்,கடலிலும்,வியாபித்திருக்கும்.என்பன போன்ற, இறுதி நபியை தவிர வேறு யாருக்கும் பொருந்தாது -- இன்னும் பல விளக்கத்தொகுப்புகள் பல அழித்தல் திருத்தல்களுக்கு மத்தியிலும்  மாறாமல் மறுதலிக்க  முடியாமல் இன்னும் பைபிளில் காணப்படுவது கண்டிப்பாக ஒரு அதிசயமே!

குறிப்பாக ஏசு நாதர் நபி (ஈஸா) அவர்கள்,இவ்வுலகிற்கு வருகை தந்ததே உலகிற்கு குறிப்பாக யூதர்களுக்கு இறுதி நபியின் வருகை குறித்து,விழிப்பூட்டுவதற்காகத்தான்.எந்த புதிய ஏற்பாட்டைக்குறித்து நன்மாராயங்கூறினார்களோஅது யதார்தத்தில் இஸ்லாமாகும்.இது யூதர்களின் வீழ்ச்சிக்குப்பிறகு பனு இஸ்மாயீல் மூலமாக நிலை நிறுத்தப்படவிருந்த சத்திய மார்க்கமாகும்.இந்த வகையில் ; இஞ்ஞில் என்பது புதிய ஏற்பாடல்ல.புதிய ஏற்பாடான இஸ்லாம் குறித்த நன்மாராயமேயாகும்.

ஹழறத் நபி ஈஸா (அலை) அவர்கள்,இறுதி நபிக்கு 600 ஆண்டுகளுக்கு முன்பு வருகை புரிந்தார்கள்.திருக்குர்ஆனில் ( 61; 06) வருகிறது.நபி ஈஸா அலை அவர்கள்,பாலஸ்தீனத்திலுள்ள யூதர்களிடம் கூறினார்கள்.அல்லாஹ் என்னை அடுத்து வரக்கூடிய நபியைக் குறித்து நற்செய்தி சொல்வதற்காக அனுப்பினான்.அவர்கள் எனக்குப்பிறகு வருவார்கள்,''அவர்களின் பெயர் அஹ்மது'' என்பதாகும்.

அஹ்மது -- முஹம்மது,இந்த இரண்டும் ஒரே பொருளைத் தரும் வார்த்தைகள்.இதன் பொருள் ''புகழப்பட்டவர்''இஞ்ஜில் பர்னாபாஸில் ''முஹம்மது'' என்று தெளிவாகவே அவர்களின் பெயர் கூறப்பட்டுள்ளது.

யூஹன்னாவின் பைபிளில் -- இஞ்ஜீலில்) முன்னறிவிப்பு செய்யப்பட்ட,வரப்போகும் இறைதூதரின் பெயர் முன்ஹமன்னா'' இதற்கு கிரேக்கத்தில் மொழி பெயர்க்கப்பட்ட போது '' பாரகலீது'' என்று ஆகிவிட்டது.இதுதான் இப்போது பிரபல்யம்.

இப்படி நற்செய்தி சொல்லப்பட்ட சுந்தர் நபி (ஸல்) அவர்கள்.கி.பி 670 ஏப்ரல்.20 திங்கட்கிழமை அரபு நாட்டில் திருமக்கா நகரில் பிறந்தார்கள்.63 ஆண்டுகள் வாழ்ந்து கி.பி 633 ஜூன்.08 திங்கட்கிழமை திரு மதினாவில் மறைந்தார்கள்.

நபித்துவப் பிரகடனம் செய்து மொத்தம் 23 ஆண்டுகளே அழைப்புப் பணி செய்தார்கள். ஆகக்குறைந்த இந்த கால கட்டத்தில் அரபு இனக்குழுக்களுக்கு மத்தியில் அவர்கள் ஏற்படுத்திய எழுச்சி,இஸ்லாமிய சகோதரத்துவ ஏகத்துவப்புரட்சி,வரலாற்றில் ஈடு இணையற்றது.இந்த இஸ்லாமியப்புரட்சி நூறு ஆண்டுக்கும் குறைவானதொரு கால கட்டத்தில் உலகின் மிகப்பெரிய வல்லரசான பாரசிக சாசானி சாம்ராஜ்யத்தையும்,ரோமாபுரியின் பாஸநதினி பேரரசையும் கைப்பற்றியது

ஒரு பக்கம் இராக் ஈரானிலிருந்து ரஷியாவின் புகாரா வரை.மறுபக்கம் சிரியா, பாலஸ்தீனத்திலிருந்து எகிப்து மற்றும் வட ஆப்ரிக்கா முழுவதையும் வெற்றி கொண்டது.பின்னர் இந்த வெற்றி முகாம் மேற்கு பக்கம் திரும்பியது.கி.பி.711-ல் ஜிப்ரால்டர் ஜலசந்தியைக்கடந்து ஸ்பெயின் மற்றும் புர்துகாலில் பிரவேசித்தது.

மேற்கு ஐரோப்பாவில் கி.பி 732--ல் அடியெடுத்து வைத்த இஸ்லாமியப்படை பிரான்ஸ் மன்னர் ஜார்லஸ் கார்ட்லால் 'தூர்''என்னுமிடத்தில் தடுத்து நிறுத்தப்பட்டது.இது மட்டும் நிகழாமல் இருந்தால் ஜவஹர் லால் நேரு எழுதுவது போல் இன்று ஐரோப்பாவின் மதம் இஸ்லாமாக இருந்திருக்கும்.இடையில் இரண்டு நூற்றாண்டுகள் சிலுவை யுத்தம்.அதற்குப்பின் மங்கோலியப்படையினரால் இரத்தவெறி தாக்குதல்கள்.எல்லாம் இருந்தும் 15 ஆம் நூற்றாண்டு வரை பெரிய பாதிப்பு ஏற்படவில்லை.எனினும் உள் மோதலால் ஸ்பெயினை மட்டும் இழக்கவேண்டியது வந்தது.அதற்குப்பிறகு உள் வெளி ஆற்றல் துர்க்கியர்களையும்,முகலாயர்களையும் தூக்கி நிலை நிறுத்தியது துர்க்கியர் 1453 --ல் காஸ்டான்டி நோபிலை வெற்றி பெற்றனர்.கிழக்கு ஐரோப்பாவில் யுகோஸ்லாவியா வரை சென்றனர்.

வியன்னாவுக்கு முன்னர் 1683 வரை துருக்கிப்படை இருந்தது.16 ஆம் நூற்றாண்டில் முகலாயர்கள்,இந்தியா,ஆப்கானிஸ்தானில்,இஸ்லாமியர் ஆட்சியை நிறுவினர்.ஆக 13 ஆம் நூற்றாண்டுக்குப்பிறகு இஸ்லாம் எந்த அளவு விரிவடைந்தது என்றால் இன்று உலகில் அனேகமாக எல்லா பகுதியிலும் முஸ்லிம்கள் வாழ்கிறார்கள்.

உலகில் நான்கு பேரில் ஒருவர் முஸ்லிமாக இருக்கிறார்.ஐம்பது நாடுகளில் பெரும்பான்மையினராக முஸ்லிம்கள் உள்ளனர்.இவ்வளவு பெரிய வளர்ச்சிக்கு மூலதனம்,அந்த் 23 ஆண்டு கால அழைப்பு பணி.ஹிஜ்ரத்துக்குப்பிறகு ஆறு வருடம் கழித்து உம்ராவுக்கு வந்தபோது 1400.பேர் இருந்த ஸஹாபாக்கள்.இன்னும் இரண்டு வருடம் கழித்து மக்கா வெற்றிக்கு வந்த போது 10.000 பேர் இருந்தனர்.இது மதீனாவிலிருந்து மட்டும் வந்த முஸ்லிம்கள் தான்.மற்ற ஊரிலிருந்து வந்தவர்களையும் சேர்த்தால் 12,000.முஸ்லிம்கள்.அடுத்து  இரண்டு வருடம் கழித்து, இறுதி ஹஜ்ஜுக்கு வந்த முஸ்லிம்கள்,பெருமானாருடன் மதீனாவிலிருந்து புறப்பட்டவர்கள் மட்டும் 90,000.மற்ற நாடுகளிலிருந்து வந்தவர்களையும் சேர்த்தால் இன்னும் அதிகம்.ஒரு அறிவிப்பின் படி 1,24,000.பேர் இருந்தார்கள்.

இவர்கள் மூலம் உலகெங்கும் இஸ்லாம் பரவி இன்று உலக மக்கள் தொகையில் 2.5.PILLIAN. (200 கோடி) முஸ்லிம்கள் வாழ்கிறார்கள்.இவ்வளவு பெரிய குறியீட்டை எட்ட உதவியது  நபிகள் நாயகத்தின் 23 ஆண்டுகால சரித்திரமே! அல்ஹம்துலில்லாஹ்...

என்றும் தங்களன்புள்ள.

மௌலானா மௌலவி அல் ஹாஃபிழ் எஸ்.எஸ். அஹ்மது ஃபாஜில் பாக்கவி

(தலைமை இமாம்,மஸ்ஜித் இந்தியா,கோலாலம்பூர்,மலேசியா.)

வெளியீடு ;-- மன்பயீ ஆலிம்.காம்

சுன்னத் வல் ஜமாஅத் பேரியக்க வாழூர் மற்றும் மலேசியக் கிளைகள்.

' மூச்சடங்கிய கம்பீரம்'

மௌலானா மௌலவி அல்ஹாஜ்,அல்லாமா எஸ்.எஸ்.கலந்தர் மஸ்தான் ரஹ்மானி ஹஜ்ரத் கிப்லா மறைவு.

SSK என்ற மூன்று எழுத்துகளில் பிரபலமாக அறியப்பட்ட முதுபெரும் இஸ்லாமிய மார்க்க அறிஞர் மௌலானா எஸ்.எஸ்.கலந்தர் மஸ்தான் ரஹ்மானி ஹஜ்ரத் அவர்கள், ஸஃபர் பிறை 5 (20.12.2012) வியாழன் அன்று மறைந்தார். ஓரிரு வருடங்களாக உடல் நிலை பாதிக்கப்பட்டிருந்தாலும்,இயலாமைக்கு ஆளாகிய இறுதி நிமிடம் வரை இஸ்லாமிய மார்க்க மேடைகளில் சங்கநாதம் செய்து கொண்டிருந்த, கம்பீரக் குரலுக்கும்,தோற்றத்திற்கும்,வாழ்விற்கும் சொந்தக்காரரான அவர்,பன்முக ஆற்றல் கொண்டவர்.

தஞ்சை மாவட்டம்,கிளியனூரில் பழமையான ' ரஹ்மானிய்யா ' அரபுக் கல்லூரியில் இஸ்லாமிய சமயக் கல்வியில் மௌலவி -- ரஹ்மானி' பட்டம் பெற்ற அவர்,கடையநல்லூர் அருகிலுள்ள 'பாம்புக் கோவில் சந்தை' என்ற கிராமத்தில் இமாமாக தன்னுடைய மார்க்க சேவையைத் தொடங்கினார்.

பின்னர் இரண்டு வருடம் நெல்லை பேட்டையில் உள்ள 'ரியாழுல் ஜினான்' அரபுக் கல்லூரியில் பேராசிரியராகப் பணியாற்றிவிட்டு,1970 இல் காயல் பட்டினத்திலுள்ள புகழ் பெற்ற 'மஹ்ழரா'  அரபுக் கல்லூரியில் பேராசிரியராகச் சேர்ந்தார். தனது வாழ்வின் இறுதி நிமிடம் வரை அங்கேயே அவர் பணியாற்றினார்.சென்னையில் சிகிச்சை பெற்று வந்த அவர்,இயலாத நிலையிலேயே விமானத்தில் சென்று கடந்த ஆண்டு மஹ்ழராவில் பட்டமளிப்பு விழாவில் கலந்து கொண்டார்.அதுவே அவர் கலந்து கொண்ட இறுதி நிகழ்ச்சியாகும்.

தமிழகம் கண்ட மேடைப் பேச்சாளர்களில் செம்மொழி  உரையாளர் அவர் கோவையில் செம்மொழி மாநாடு நடைபெற்ற போது அதற்கு அப்துல் கலாம் அழைக்கப்படவில்லையே' என தமிழகம் வருத்தப்பட்டது.SSK  அழைக்கவில்லையே என்று நான் வருந்தினேன்.

அரை நூற்றாண்டுக்கும் மேலாக தமிழ் பேசும் உலகமெங்கும் தேனினிய சொற்களில் தேக்கு நிகர் கருத்துகளைப் பேசி, தமிழ் மொழியைச் செம்மைப் படுத்திக் கொண்டிருந்த குரலுக்குச் சொந்தக்காரர் அவர்.பரந்து விரிந்த செம்மொழி மாநாட்டின் மேடையில் SSK  வின் குரல் ஒலித்தால் எப்படி இருக்கும்?அந்தக் கூட்டம் மகரந்தத்தில் விழுந்த தேனீ போல எப்படி மயங்கிக் கிடக்கும் என்று,நூறடி தூரத்தில் உட்கார்ந்து நான் கற்பனை செய்தது,இப்போதும் என் நினைவுக்கு வருகிறது.

'காதிரிய்யா' ஆன்மீக வழியில் தொடர்பு கொண்டிருந்த அவர்,பெரும்பாலும் மார்க்க -- ஆன்மீகம் சார்ந்த உரைகளையே நிகழ்த்தினார்.இது சார்ந்த கருத்துகளைக் கையாள்வதில் அவரது உறுதியும்,பாணியும் அலாதியானது.அதேநேரத்தில்,எந்த தலைப்பையும் எடுத்தாள்வதில் வல்லவர்; அதில் தனக்கென ஒரு முத்திரையைப் பதிய வைப்பவர்.

பத்து அல்லது பன்னிரெண்டு வருடங்களுக்கு முன்பு,அம்பாசமுத்திரத்தில் நடைபெற்ற ஜமாஅத்துல் உலமாவின் மாநாட்டில்,இரவு சுமார் 1 மணிக்கு 'குர்ஆனும்,அறிவியலும்' என்ற தலைப்பில் அவர் ஆற்றிய உரை,இன்று வரை என்னால் மறக்க முடியாதது.பன்மொழிப் புலமையும்,நினைவாற்றலும்,ஆழ்ந்த ஈடுபாடும் அவரது உரைகளுக்குப் பெரிதும் மெருகூட்டின.

'அவர் ஷாஃபி' மத்ஹபின் சட்ட நுணுக்கங்களில் விற்பன்னர்.ஹஜ்ஜின் போது, அந்நியப் பெண்கள் மீது கை கால்,பட்டுவிட்டால் 'ஒளு' முறியாது என்பதுதான் ஷாஃபி மத்ஹபின் சட்டம்' என தனக்குத் தெளிவுபடுத்தியது SSK ஹஜ்ரத் தான் என மேலப்பாளையம் காஜா முஈனுத்தீன் பாக்கவி கூறினார்.

அரசியல் ரீதியாக, இந்தியன் யூனியன் முஸ்லிம் லீக்கில் இணைந்து பணியாற்றி,மாநில துணைத் தலைவர் வரை பொறுப்பு வகித்தார்.

'கொடுத்துதவுவதில்' அவருக்கு நிகர் அவர்தான் அன்னாரைக் குளிப்பாட்டும் பணியில் ஈடுபட்டிருந்த ஒருவர்,'' எங்க உஸ்தாது எனக்கு துன்யாவையும் தந்தார்; ஆகிரத்தையும் தந்தார் ''  என்று புலம்பியதைக்கேட்டு பலரும் கண்கலங்கினர் '' என கோவை அப்துல் ஜலீல் இம்தாதி கூறினார்.

இலங்கை,மலேசியா,சிங்கப்பூர்,புருனை,வளைகுடா நாடுகள் என... தமிழ் பேசும் மக்கள் வாழும் தேசமெங்கும் தீன் முழக்கம் செய்த அவர்,தென்கிழக்காசிய நாடுகளில் வாழும் மக்களிடம் இஸ்லாமிய மிதவாத கோட்பாடான' சுன்னத் வல் ஜமாஅத்தின் கருத்துக்களை நிறுவுவதில் முக்கிய பங்காற்றினார்.துருக்கி,பாலஸ்தீனம் போன்ற நாடுகளுக்கு பயணம் செய்துள்ள அவர்,பைத்துல் முகத்தஸிற்கு பல முறை சென்றுள்ளார்.

1983 முதல் 2011 ஆம் ஆண்டு வரை இடையில் ஒரு வருடம் தவிர்த்து,மற்ற அனைத்து வருடங்களிலும் புனித ஹஜ் பயணத்தை மேற்கொள்ளும் வாய்ப்பு அவர் பெற்றிருந்தார்.பெரும்பாலான பயணங்களில் ' ஸியாரா ' என்ற புனித தலங்களைத் தரிசிக்கும் வகையில் அமைத்துக்கொள்வது அவரது இயல்பு.

தென்காசி,கடையநல்லூரின் சிலம லெப்பை குடும்பத்தைச் சேர்ந்த சுலைமான் சாஹிபின் புதல்வரான SSK  ஹஜ்ரத் அவர்களுக்கு,ஹாஜிரா பேகம் என்ற மனைவியும்,அப்துல்லாஹ்,நூருத்தீன் என்ற இரு மகன்களும்,ராபியத்துல் பஸரியா என்ற ஒரு மகளும் உள்ளனர்.ஹஜ்ரத்தின் இன்னொரு மகளான மர்யம் என்பவர்,மதீனாவில் மரண மெய்து ஜன்னதுல் பகீஃ ' பூந்தோட்டத்தில் நல்லடக்கம் செய்யப்பட்டுள்ளார்.

டிசம்பர் 21, வெள்ளிக்கிழமை காலை 9 மணியளவில் கடையநல்லூர் நைனார் முஹம்மது ஜும்ஆ பள்ளிவாசல் வளாகத்தில் நடைபெற்ற அவருடைய ' ஜனாஸா ' நல்லடக்கத்தில் ஆயிரக்கணக்கானோர் கலந்து கொண்டனர்.

நபிகள் நாயகம் (ஸல்) அவர்கள் மீதும் நல்லடியார்கள் மீதும் மாறாத நேசம் கொண்ட அவரது வாழ்வும்,வார்த்தைகளும் தமிழ் முஸ்லிம் உலகத்தை நீண்டகாலம் ஆட்கொண்டிருந்தது என்பது, SSK ஹஜ்ரத்தின் வாழ்நாள் சாதனையாகும்.

அந்த நேசத்தையே அவரது மறு உலக வாழ்விற்கான ஆதாரமாக அல்லாஹ் ஆக்கிவைக்கட்டும்.

நன்றி ;-- கோவை அப்துல் அஜீஸ் பாக்கவி ஹஜ்ரத் (சமநிலைச் சமுதாயம்)

வெளியீடு ;--  மன்பஈ ஆலிம்.காம்

சுன்னத் வல் ஜமாஅத் பேரியக்க வாழூர் மற்றும் மலேசியக் கிளைகள்.